INAMA IBANZIRIZA SINODI (ASSEMBLEE PRE-SYNODALE)

Ku matariki ya 9 na 10 ukwakira 2021 i Roma, Nyirubutungane Papa Fransisko, Umushumba wa Kiliziya gatolika ku isi, yatangije urugendo rwa sinodi y’Abepiskopi izabera i Roma muri 2023. Iyo sinodi ifite insanganyamatsiko igira iti : « Kiliziya mu rugendo : ubumwe, ubufatanye n’ubutumwa ». Iyi nsanganyamatsiko iradushishikariza twese kugendera mu cyerecyezo kimwe, twunze ubumwe kandi buri wese agira uruhare mu butumwa bwa Kiliziya.

Muri Diyosezi ya Nyundo, urwo rugendo rwatangiye ku cyumweru, tariki 17 ukwakira 2021, rutangizwa na Nyiricyubahiro Musenyeri Anaclet MWUMVANEZA, Umwepiskopi wa Nyundo,  mu itangazo yagejeje ku bapadiri, abihayimana n’abakristu bose ba Diyosezi ya Nyundo. Muri urwo rugendo rwa sinodi hari ibikorwa byakozwe mu rwego rwa Diyosezi kandi bimwe muri byo biracyakomeje. Bimwe muri byo ni inama zinyuranye Umwepiskopi yagiranye  n’abapadiri kugira ngo imyiteguro y’iyo sinodi igende neza kandi imyanzuro yayo izafashe abakristu kugendera mu cyerecyezo kimwe koko. Inama ya mbere yabaye ku matariki ya 11 Werurwe 2022 ikaba yari igamije kureba aho amaparuwasi yari ari ageze yinjira mu rugendo rwa sinodi. Iya kabiri yabaye  tariki ya 21 na 22 Mata 2022. Muri iyi nama Umwepiskopi n’abapadiri bunguranye ibitekerezo ku bibazo byari byaroherejwe muri za Doyennés ndetse abapadiri bagaragaza uko babiganiriyeho bo ubwabo muri za Doyennés bakoreramo ubutumwa.

Mu rwego rwo kungurana ibitecyerezo ku cyegeranyo cyavuye mu mu bisubizo by’abakristu  n’izindi nzego kuri ibyo bibazo, ku wa 29 kamena 2022, abapadiri bose ba Diyosezi ya Nyundo bakorera ubutumwa mu Rwanda no mu mahanga, abahagarariye ingo z’Abihayimana, abahagarariye komisiyo ya Paruwasi ishinzwe gukurikirana urugendo rwa sinodi y’Abepiskopi izabera i Roma muri 2023 n’abakuriye Komisiyo ya Diyosezi ya Nyundo ishinzwe Ikenurabushyo rusange, bagiranye inama ku buryo bw’ikorabuhanga. Iyi nama yari igamije kuganira ku cyegeranyo cy’ibyavuye mu ma paruwasi  no kubyunguranaho ibitecyerezo harebwa by’umwihariko uko byafasha kurushaho kuvugurura Ikenurabushyo  muri Diyosezi ya Nyundo. Iyo nama yayobowe na Musenyeri J. M.V NSENGUMUREMYI wari uhagarariye Umwepiskopi wa Nyundo. Atangiza inama, yashimiye by’umwihariko abayiteguye  n’abakoze umurimo ukomeye wo kwegeranya ibyavuye muri Paruwasi zose za Diyosezi ya Nyundo no mu yandi ma serivisi. Yabibukije ko ibikubiye muri icyo cyegeranyo bireba abapadiri bose, abihayimana n’abagize umuryango w’Imana bose muri Diyosezi ya Nyundo.

Mbere yo kugezwaho imyanzuro ikubiye mu cyegeranyo cy’ibisubizo byatanzwe n’abakristu, Padiri Alfred UWANTAGARA yatanze ikiganiro kivuga ku kukugendera hamwe: “KUGENDERA HAMWE MURI SINODI BITUVUGURURAMO ISHYAKA RYO GUFATANYA MU BUTUMWA BWACU”. https://nyundodiocese.info/fr/kugendera-hamwe-muri-sinodi-bituvugururamo-ishyaka-ryo-gufatanya-mu-butumwa-bwacu-2/ . Nyuma yacyo abari bitabiriye inama bagejejejweho ibisubizo byatanzwe n’abakristu mu ma Paruwasi yose ya Diyosezi ya Nyundo. https://nyundodiocese.info/fr/synthese-du-processus-synodal-dans-le-diocese-de-nyundo-pour-une-eglise-synodale-communion-participation-et-mission/

Nyuma yo kugezwaho ibyavuye mu ma Paruwasi hakurikiyeho umwanya wo kungurana ibitekerezo. Musenyeri J.M.V NSENGUMUREMYI yibukije abari bitabiriye inama bose ko sinodi y’Abepiskopi izabera i Roma yaje ishimangira sinodi yabereye  muri Diyosezi ya Nyundo kuva mu 1989 kugeza muri 2001 cyane cyane mu kwimakazwa isano ihebuje dufitanye n’Imana n’abavandimwe.

Mu bitekerezo byatanzwe, hari abagarutse ku cyorezo cya covid-19 cyane cyane ku ngaruka cyateye n’uburyo zashakirwa umuti urambye. Bavuze ko icyo cyorezo cyatumye abakristu bamwe bajya mu yandi madini, mu byumba by’amasengesho, gusengera mu buvumo n’ahandi ariko bakabikora  mu rwego rwo kwirwanaho. Icyorezo gicishije make bamwe ntibagarutse abandi bashinze amatsinda asa nk’amadini ku buryo bayobya abakristu bagenzi babo bitwaje ko babasengera. Kugirango rero ibyo byose bikemuke ni ngombwa ko liturjiya yavugururwa bityo igafasha abajyaga gushakira ubushyuhe mu yandi madini. Icya kabiri, hazatekerezwa uko isengesho ryo gusabira abarwayi ryahabwa umurongo kugirango ridakorwa n’abatabifititiye ububasha kandi bishakira izindi nyungu ndetse zimwe ziyobya abakristu.

Abatanze ibitekerezo kandi bagaragaje ko ari byiza kwishimira ko kiliziya ibanye neza n’ayo madini ariko ntawakwirengagiza ko abayoboke bayo bugarijwe na bamwe mu bayoboke b’ayo madini bayobya abakristu gatolika bagamije kongera umubare w’abayoboke babo. Birakwiye rero gufasha abakristu gatolika, bakigishwa kugira ngo bashinge imizi mu kwemera kwabo. Ariko na none ni byiza kureba niba ikibazo kitari iwacu muri Kiliziya. Akenshi usanga missa ariyo ishyirwamo imbaraga kandi hari n’ubundi buryo bwinshi budahabwa imbaraga kandi bufasha abakristu gusabana n’Imana ku buryo abenshi bajya mu yandi madini bagiye gushaka ubwo buryo.

Hari kandi amwe mu matsinda afasha mu ikenurabushyo nk’Imiryango ya Agisiyo Gatolika n’amakoraniro y’abasenga. Ni byiza ko abakristu batozwa kandi bagashishikarizwa kujya muri iyo miryango ndetse no mu matsinda y’abasenga. Abapadiri n’avalayiki bavuze ko hari imiryango imwe n’imwe n’amatsinda yashinze ibimeze nk’amadini bakayobya abakristu babagana babeshya ko babonekerwa, bakabaka amaturo n’ibindi. Ni byiza gutoza abakristu umuco mwiza wo kujya muri iyo miryango n’amatsinda y’abasenga ariko bakanasobanurirwa uko bagomba kwitwara cyane cyane bakabatoza kwima amatwi abo bose babayobya. Nk’uko bikiramariya yabivuze « ubuyobe buzaza mu mayeri ».

Ku kibazo cy’abashakanye bakaba baratandukanye kandi bifuza guhabwa umurongo w’ubuzima bwabo, byagaragaye ko icyo kibazo kiri ku isi hose. Ubundi abasezerana batandukanywa n’urupfu. Iyo batandukanye badatandukanyijwe n’urupfu, kiliziya ikomeza guha agaciro isezerano ryabo. Ntibahabwa amasakramentu ariko iyo abana babo bigaragaye ko bazarerwa mu kwemera kwa kiliziya, bafite uburenganzira bwa guhabwa Batisimu.  Hari umurongo wa Kiliziya ariko na none ni byiza kubafasha bakegerwa kandi bagaherekezwa aho kubacira urubanza. Icyakimakazwa ni uguha agaciro abo bantu bagafatwa nk’abana ba kiliziya kandi bagomba gufashwa, bagaherekezwa mu buryo bwabo bwo guhura n’Imana. Ntibikwiye ko hagira ubacira urubanza. Muri urwo rwego, hari aho batangiye kubahuriza mu matsinda kugirango nabo biyumve muri kiliziya. Ahandi ndetse mu gihe cyo guhazwa bakora umutambagiro bagahabwa umugisha. Mu nyandiko Amoris Laetitia Papa Fransisko avuga ko abo bahazwa kuri roho (communion spirtuelle)

Mu gusoza, abatanze ibitekerezo basabye ko icyegeranyo cyakusanyijwe cyazagezwa kuri benshi bashoboka. Padiri Antoine de Padoue NSINGIJIMANA yababwiye ko icyo cyegeranyo kizoherezwa mu ma Paruwasi kugirango abapadiri babigeze ku bakristu, ku bihayimana ko yandi matsinda agira uruhare mu butumwa bwa Paruwasi. Ikindi kandi iyo sinodi  ishojwe, Papa asohora inyandiko ikubiyemo imyanzuro n’ibitekerezo byavuye ku isi yose.  Iyo nyandiko nayo niboneka izagezwa ku bakristu kandi ishyirwe mu rurimi bashobora kumva neza.

Twabibutsa ko ku rwego rwa Diyosezi ya Nyundo, uru rugendo rwa Sinodi ruzasozwa ku itariki ya 15 Kanama 2022 muri Paruwasi Crête Congo-Nil. Tumenyereye ko kuri iyo tariki Umwepiskopi ageza ku bakristu n’abapadiri icyerecyezo cy’umwaka w’iyogezabutumwa kandi agatura Umubyeyi w’abakene abapadiri bashya.

Padiri Jean-Paul SEBAGARAGU

Leave Comment

Your email address will not be published.