AMASOMO MATAGATIFU TUZIRIKANA:

ISOMO RYA MBERE: Ivug 4, 1-2.6-8;

ZABURI: Zab 15(14), 2-3a, 3bc-4ab, 4d-5;

ISOMO RYA KABIRI: Yak 1, 17-18.21b-22.27;

 IVANJILI: Mk 7, 1-8.14-15.21-23.

 

“Uhoraho, ni nde ukwiye kwinjira mu ngoro yawe?”

Bavandimwe, twahimbaje icyumweru cya 22 Gisanzwe cy’Umwaka wa Liturujiya B. Kiliziya iraduhamagarira kwinjira mu muryango ufunganye kugirango turonke umukiro Yezu atanga. Koko unkunda akomera ku mategeko yanjye (Yh 14, 15). Ni Yezu ubyivugira. Kubaho turiho ni ukuba mu rukundo rwa Yezu Kristu. Kubaho turiho ni ugukomera ku mategeko ye.

Ubusanzwe itegeko ribereyeho gufasha abantu kubana neza n’abandi. Kubaho ni ukubana. Abanyarwanda baca umugani bagira bati “Nta mugabo umwe”. No mu irema Uhoraho yarabishimangiye: “Si byiza ko muntu aba wenyine” (Intg 2, 18). Imana yaturemeye kubana. Umunyarwanda aragira ati: “Nta zibana zidakomanye amahembe”. Itegeko rituma muntu yitandukanya n’inyamanswa n’amatungo, akabaho azi kandi azirikana ku nshingano ze n’Uburenganzira bwe bigatuma agira imibereho itandukanye n’iy’inyamanswa. Niyo mpamvu muntu agira amategeko, atabereho guhana gusa ahubwo abereyeho kuyobora abantu.

Mu isomo rya mbere twazirikanye uko Uhoraho yatanze itegeko ngo tubeho: “Israheli, umva amategeko n’imigenzo mbigisha ubwanjye gukurikiza, maze muzabone kubaho no kwinjira mu gihugu Uhoraho Imana y’abasokuruza banyu abahaye ngo mukigarurire” (Ivug 4, 1). Uhoraho ubwe yitangiye itegeko ariha umuryango we. Ntabwo ari itegeko ry’abantu, ahubwo ni itegeko ry’Imana ubwayo. Kubaho tutariho ni ukubaho tudashaka kugengwa no kumvira itegeko. Bamwe baravuga bati “amategeko arusha amabuye kuremera”, ariko kandi ku bemera Kristu bakiyemeza kumukurikira no kumukurikiza, amategeko bayagira ubuzima kandi  kuri bo amategeko ni akabando k’iminsi.  Uburemere ntibuyarangwaho bityo bakabaho mu bw’igenge bw’abana b’Imana. Kristu ubwe Niwe utwibwirira ko amategeko ye yoroshye, kandi ko ibyo adukorera bitaremereye (Mt11, 30). Tumusange aturuhure, tumusange aradukiza.

Koko gukomera ku mategeko y’Uhoraho bitugira abantu bakomeye, muri Kristu, dushobora ibyananiranye. Muzayakomereho, muyakurikize; ni cyo kizatuma muba abanyabwenge mu maso y’amahanga (Ivug 4, 6). Ubuhanga, Ubwenge, Ubumenyi, Ubushishozi (….) bituruka ku Mana, tubironkera muri Roho Mutagatifu uhabwa abamwemera. Ngubwo ubuzima buzima dukomora kuri Yezu Kristu. Koko ubwenge butarimo Imana ni ubujiji bukabije, ni Ubutindi.

Mu isomo rya kabiri Mutagatifu Yakobo aradukangurira kumenya isoko y’ibyiza.  Koko Ibiturutse ku Mana aba ari byiza: “Icyitwa ingabire y’agaciro cyose n’ituro rishyitse iryo ari ryo ryose bikomoka mu ijuru ku Mubyeyi w’urumuri (Yak 1, 17). Imana ni Urumuri, Imana ni Urukundo, ni Ubuzima. Menya Imana ubeho. Hari ababeshyera Imana cyane cyane igihe cy’amagorwa, ibyago, n’ibindi bibazo bakabishyira ku Mana. Nyamara kuva mu irema, Imana yasanze ari byiza. Ntabwo Imana yaremye ikibi. Urumamfu mu ngano rwazanywe na nyakibi. Igisubizo cy’ikibazo dusanga muri Zaburi tuzirikana, turagisanga mu Masomo Matagatifu y’icyi cyumweru.

“Uhoraho, ni nde ukwiye kwinjira mu ngoro yawe?

Ni umuntu utajorwa mu mibereho ye, Agakurikiza ubutabera, kandi akavugisha ukuri k’umutima we (Zab 15(14), 1a-2.  Mutagatifu Yakobo arabishimangira: «Mube abantu bagaragaza mu bikorwa Ijambo ry’Imana, kuko kwishimira kuryumva byonyine ari ukwibeshya (Yak 1, 22). Ibikorwa byacu bigaragaze abo turibo, batumenyere ku mibereho yacu, batumenyere ku byo tuvuga n’ibyo dukora. Iyobokamana risukuye kandi ritagira amakemwa mu maso y’Imana Data ni iri ngiri : ni ugusura imfubyi n’abapfakazi mu magorwa yabo, kwirinda ubwandu bwose bwo kuri iyi si kugira ngo tube abaziranenge (Yak 1, 27).

Bavandimwe, dukore iki? Dushakire umukiro ahadukiza tureke gushakira umukiro ahaduhuhura. « Koko akababaje umutima kazindura amaguru ». Wowe nanjye, ni iki kidushishikaje? Koko Uhoraho ibyo yatugeneye yasanze ari byiza kandi abitugenera ku rugero rwa buri wese ashingiye ku bushobozi bwe. Ni yo mpamvu «Nta kintu kijya mu muntu giturutse inyuma kimuhumanya, ahubwo ikivuye mu muntu ni cyo kimuhumanya » (Mk7, 15), Yezu niwe ubitwigisha. Mu mutima w’abantu niho haturuka imigambi mibi: ubusambanyi, ubujura, ubwicanyi, ubuhabara, umururumba, ubugome, uburyarya, ingeso mbi, ishyari, gutukana, ubwirasi n’amafuti. Ibyo bintu byose bibi biva mu mutima ni byo bihumanya umuntu (Mk 7, 21-23).

Kubaho turiho bizaduha kurumbuka imbuto nziza. Witinya Nyagasani muri kumwe. Mu mutima w’abemera Kristu, bamukunda kandi bagakurikiza amategeko ye, harangwa urukundo, ineza, ibyishimo, umunezero, amahoro, impuhwe, umugisha n’ibindi byiza byinshi. Ngubwo Ubuzima twagombye guharanira mu mibereho yacu. Ubu buzima Kristu atubwira tubukesha ijambo rye. Ubu buzima nibwo magara ataguranwa amagana. Ntacyo watanga ngo ubone ubwo buzima. Sanga Yezu Kristu, abutanga ku buntu, icyo ashaka ni Umwanya wawe, igihe cyawe, umutima wawe. Umubyeyi Bikira Mariya adusabire twese ku Mana muri uru rugendo.

 

Padiri Théodose UTUJE

Leave Comment

Votre adresse de messagerie ne sera pas publiée. Les champs obligatoires sont indiqués avec *