Amasomo matagatifu tuzirikana:
ü Isomo rya mbere: Iyim
12, 1-8.11-14
ü Za 115(116b). 12-13,
15-16ac, 17-18
ü Isomo rya Kabiri: 1Kor
11, 23-26
ü Ivanjiri: Yh 13, 1-15
UMUGENZO MWIZA WO GUCA BUGUFI
1.Tumaze iminsi 40 mu gisibo nka Kristu mu butayu. Twarasibye. Uwasibye arashonja. None uyu munsi, Umubyeyi wacu Kiliziya yaduteguriye ifunguro rihire. Nk'uko Umubyeyi amenya neza ko abana be bashonje; uyu munsi yaduteguriye ifunguro ry'Ubuzima buhoraho: UKARISTIYA NTAGATIFU- Yezu Kristu ubwe aratwiha.
2.Umwana w'umunyarwanda yahimbye indirimbo nziza. Kimwe mu gitero cyayo iragira iti: "Mu isakaramentu ryawe, Muremyi Uhoraho, ayo twavuga yose ntiyangana n'ubuntu ugwiza kubo waremye wacunguye, TURAGUSHIMA".
3.Yezu ati: Iki ni umubiri wanjye mwakire murye; iki ni amaraso yanjye mwakire munywe. Muri ukaristiya Imana ntago yigize umuntu gusa ahubwo yigize ubusabusa: ‘Umugati’. Iri ni iyobera rikomeye ry'ukwemera.
4.Ayo twavuga yose ntiyaheza iyo neza twagiriwe. Icyo umuntu yakora cyibanze ni Ugushima:"Nyagasani ntiwaducunguye gusa ahubwo wiyemeje no kudutunga, kugirango tubeho muri ubu buzima tubeshejweho nawe, kandi dutegereze nanone ubugingo bushya dukesha iyi ngabire yawe: Ukaristiya Ntagatifu”. (Igit. cy’umukristu p.62) WARAKOZE. Ubu koko ntagushidikanya uri kumwe natwe iminsi yose kugeza igihe isi izashirira. (Mt 28:20).
4. Muri uko kurema Ukaristiya, Yezu yaremye n'Impanga yaryo: isakaramentu ry'ubusaseridoti aho yagize ati: Mujye mubikora munyibuka. Bityo, Ukaristiya ikazajya itwibutsa iteka igitambo cyaducunguye.
5.Uyu munsi w'uwa Kane mutagatifu rwose wicishije bugufi kurushaho. Washatse kudusigira umurage tutazibagirwa ko, urukundo rutuye mu bwicishe bugufi. Wabitweretse muri Ukaristiya ntagatifu ndetse no mu koza abagishwa bawe ibirenge.
6. Umugenzo mwiza uhetse indi wo guca bugufi, uyu munsi warawutsindagiye. Kuva mu ntangiriro wawuduhayemo urugero wigira umuntu kandi ukabana n’abantu, maze ukaboneraho ukawubigisha; none uyu munsi ushatse kuwudusigiramo umurage: Bitwereka ko Uguca bugufi imana ibidukeneyeho cyane. « Si grande est l’utilité de l’humilité humaine que la majesté divine l’a recommandée par son exemple » (Saint Augustin). Impamvu nuko izi ko aribyo bituma tutaba abacakara. Ntibitwambura isura yayo ahubwo birayishimangira, kuko igaragarira m'urukundo ruca bugufi.
7. Kuri iyi isi, twese, buri wese, ashaka gusiga izina, ashaka kubahwa, ko hatagira umusuzugura, yifuza kuvugwa neza, gutsinda, ko aho ari babona ko ahari, gukomerwa amashyi, kuba mukuru...Ariko iyo witegereje neza, kubera uko ibyo tubishakamo bituma tuba abagaragu b'ibyifuzo byacu n'ibyabandi, bitugira abacakara.
7. Yezu arashaka kutwereka ibanga ryo kuba Mukuru koko.
Yohani umwanditsi w’ivanjili ati:
"Yezu ni ko kuva ku meza, avanamo umwitero maze afata igitambaro aragikenyera. Asuka amazi ku ibesani atangira koza abigishwa be ibirenge, no kubahanaguza cya gitambaro yari akenyeje."
7. Yezu, nguwo aroza Yuda ugiye kumugambanira. Aroza Petero ugiye kumwihakana. Ndetse n’abandi bigishwa bari bagiye kumusiga bakigendera. Ibyo bitwibutsa n'undi murage yadusigiye uyu munsi w'Urukundo, aho yagize ati: " Nk’uko nabakunze abe ari ko namwe mujya mukundana " (Yh 13, 34). Mwese ntanumwe ntogeje ibirenge. Nabakunze uko nabasanze. Uko mwari. Namwe mujye mukundana mutyo:Mukunde abanzi banyu, musabire ababatoteza. (Mt 5, 44)
8. Nguwo Yezu, aroza ibirenge abigishwa be. Arigira umugaragu kandi ari Umwigisha mukuru-kuko icyo gikorwa cyakorwaga n'abagaragu. Petero usanzwe ubangutse ati: “Nyagasani, ni wowe ugiye kunyoza ibirenge?” [...] Reka da, ntuzigera unyoza ibirenge. Mu yandi magambo: ni gute Kristu, Umwana w'Imana, Imana yanjye, yakwisuzuguza bigeza aha? Birakabije. Ntago waba ukiri Imana. Ntago waba ukiri umwigisha wanjye. Ibyo si ibyawe. Ubwo se icyubahiro cyaha ari ikihe?
9. Yezu uzibyo akora aramusubiza ati: “Nturamenya icyo nkora ariko uzakimenya hanyuma.” Uzamenya ko kuba mukuru, ko gukomera nyabyo, atari ugutegeka no gutuma abandi baba abagaragu bawe. Si ugukandamaza abandi. Ahubwo kuba mukuru ni ukuba umugaragu w'abandi. Kuberako uzi kwicisha bugufi, uzi kwiyoroshya, ntatinye gutakaza icyo ari icyo, uwo ni we ukomeye. Wa wundi uzi kwicisha bugufi, akemera no kugaragara nk’uworoheje atitaye ku kuba yatakaza icyubahiro cye, ni we uba ukomeye by’ukuri. Uwo ni we mukuru.
10. Iyo kandi niyo Mana yacu, Nkuru bihagije kuburyo itatewe ipfunwe no guca bugufi. (Il est suffisament grand pour n'avoir aucune peur de la kénose). Irakomeye bihagije kuburyo itagize ubwoba bwo koroha no koroshya. Ni Imana yuje ubuzima kuburyo itagize impungenge zo kubutanga. Ni Imana Yuje icyubahiro kuburyo tigeze igira ubwoba bwo gusuzugurwa. Iyo niyo Mana yacu.
10. Yezu araduhishurira iryo Banga none. Aratwigisha ko
icyubahiro nyacyo kiri mu kugiha abandi, mu kwitangira abanda, mu kwemera guca
bugufi.
Aratwereka icyubahiro twese twageraho. Kitagombera kuba umucakara, kitaduhoza ku nkeke ngo bansuzuguye, kitadusaba amafaranga n'ububasha, kidasaba amashyi. Ni icyubahiro tutakwamburwa kiri mu kwita ku bandi, kuboza ibirenge, Guca bugufi.
11. Yezu ati: "Ubwo rero mbogeje ibirenge, ndi Shobuja n'Umwigisha wanyu namwe mugomba kubyozanya.Mbahaye urugero ngo mujye mukora nk'uko mbagiriye.[...] Ubwo mumenye ibyo muzaba muhiriwe nimubikurikiza.( Jn13, 14-15.17l).
12.Yezu ugira umutima utuza kandi
woroshya, umutima wacu uwugire nk'uwawe. Amen.
Padiri
Innocent HAKIZIMAMNA
