Amasomo matagatifu tuzirikana:
Isomo rya mbere :
2 Bami 4, 8-11.14-16a
Zaburi :
Zab 89 (89)
Isomo rya kabiri : Rm 6, 3-4.8-11
Ivanjili :
Mt 10, 37-42
Tuzirikane Ijambo ry’Imana
Mu
kuzirikana Ijambo ry’Imana liturjiya ya Kiliziya yaduteguriye kuri iki Cyumweru,
reka nterurire ku Ivanjili ya Matayo tumaze kumva. Harimo ingingo ebyiri
z’ingenzi : iya mbere irebana n’ikintu gikomeye gisabwa uukwiriye kuba
umwigishwa wa YezuKristu : Kwiyibagirwa ; urabisoma ukumva bikomeye,
ariko ingingo ya kabiri ikaza ihumuriza uwemeye kuba umwigishwa, by’akarusho,
uwemeye kuba intumwa, kuko ari umuntu ukwiriye kwakirwa no kubahwa n’abakunda
Imana.
Matayo,
umwanditsi w’Ivanjili tuzirikana none, ayandika yagerageje kugabanya mu ngingo
eshanu inyigisho za Yezu. Ivanjili twumvise none, iri mu gace ka kabiri
abahanga biga bagasesengura Bibiliya bavuga ko ari inyigisho ireba
abahamagarirwa kuvuga ubutumwa (mu rurimi rw’igifaransa, umutwe wa cumi w’ivanjili
ya Matayo bawita « Discours missionnaire »). Ni inama zuzuye ubuhanga
n’ubushishozi zireba mbere na mbere abahamagarirwa ubutumwa, zikanareba
abigishwa muri rusange, kuko buri mwigishwa, kubera batisimu yahawe, aba ari
intumwa. Twese dusezerana gukurikira Yezu Kristu no kumwamamaza.
Ukwiriye kuba
umwigishwa
Mu gace ka
mbere k’ivanjili yo kuri iki cyumweru, Yezu aravuga ukwiriye kuba umwigishwa
we, ukwiriye kumukurikira : ni umukunda kurusha abandi bose umuntu
ashobora gukunda mu buzima. Ni umukunda kurusha ababyeyi, ni umukunda kurusha
abana. Mu kuvuga aba bombi, ababyeyi n’abana, Yezu avuze ba bandi bose umuntu
ashobora kwizirikaho, abo mu bihe byashize n’abo mu bihe bizaza. Arangije
anavuga ko umuntu agomba kumukunda kurusha uko yikunda : « udatwara
umusaraba we ngo ankurikire ntakwirye kuba uwanjye ». Kumukunda,
kumwizirikaho bigomba kuza mbere y’abandi bose, mbere y’ibindi byose umuntu
ashobora gukunda no kwizirikaho. Hari ikintu gikomeye Yezu atubwiye muri iyi
nyigisho : ushishikajwe no kwiranaho, ahasiga ubuzima ; naho uhara
amagara ye kubera Kristu, kubera urukundo amufitiye, ni we uronka ubuzima. Uku
kuri gutandukanye n’imitekerereze isanzwe y’abantu, ni ukuri gusaba guhinduka
(conversion), gusaba ubutwari (courage).
Kwakira abandi, by’umwihariko kwakira intumwa ya Yezu
Mu
bisanzwe, kwemera no kumenya kwakira abandi ni umuco mwiza wacu twebwe abanyarwanda.
Ni umuco twiyiziho n’abandi batuziho. Mu mvugo y’ubu, ni indangagaciro ikomeye y’ubunyarwanda.
Turitonde tutazayamburwa n’ibigezweho, cyangwa ngo tuyamburwe n’ubwoba buturuka
ku bupagani n’rukundo ruke. Ni koko kwakira umuntu mu gihe turimo bisaba
ubushishozi kurusha kera, bisaba ubutwari, ariko ibyo ntibivuga ko tugomba
kubivaho, ahubwo umukristu nyawe, nawe agomba kwiyungura amayeri yo kubikora
bijyanye n’igihe turimo. Niba turi abana b’Ingoma koko, abana b’isi
ntibakaturushe ubwenge ngo dutwarwe n’ubugome bwayo, ngo imigenzereze yacu
igengwe n’ubwoba buterwa n’ububi bushobora kugaragara mu bantu.
Ibyo ni ukwakira muri
rusange. Noneho by’umwihariko Yezu aratubwira kwakira abandi tubitewe
n’urukundo tumufitiye, n’urukundo dufitiye abe, bityo ya ndangagaciro
y’ubunyarwanda tukayigira indangagaciro y’ubukristu koko.
Iyo usomye iyi Vanjili ya none wumva
ukuntu igikorwa cyo kwamamaza ivanjili gishingiye ku kwakira. Yezu ati :
« Ubakiriye neza, ni jye aba yakiriye, n’unyakiriye aba yakiriye
uwantumye ». Iri hame ni ryo riduhuza na Kristu ubwe, ni ryo riduhuza n’Intumwa.
Aya magambo yavuzwe na Yezu abwira intumwa ze cumi n’ebyiri, ariko muri twese
nta wibatirijwe na Yezu ubwe, dukomezwa nta wakomejwe na Petero cyangwa Yohani,
cyangwa umwe muri ba cumi na babiri. Ariko na none ni Yezu ubwe rwose udukozaho
ukuboko kwe gukiza mu masakaramentu : ni we ushyikirana natwe tukanywana
mu isakaramentu ry’Ukaristiya ; ni we udukiza muri Penetensiya n’Ugusigwa
kw’abarwayi, ni we uturamburiraho ibiganza mu masakaramentu yose ; mu Bepiskopi
n’abafasha babo ari bo bapadiri ni za ntumwa cumi n’ebyiri tuba twakiriye, maze
uko amasekuru agenda asimburana Nyagasani agakomeza kwigisha, kuyobora no
gutagatifuza.
Kwakira abo bigisha
bijyanye no kwakira uwo ari we wese tubitewe n’uburyo atugaragariza isura ya Nyagasani.
Tuzi ko Kristu yigaragariza cyane mu baciye bugufi. Kubitaho, n’iyo byaba
agakorwa gato cyane, nko gutanga agakombe k’amazi, ni iby’agaciro gakomeye.
Ubikora ntazabura ingororano. Gukunda umuntu kubera ko ari umunyakuri, kubera
ko akunda gusenga, kubera ko ari imfura n’inyangamugayo, kubera ko agira ubuntu
n’ubumuntu, kubera ko wamwitegereje ugasanga akoreshwa n’urukundo kurusha
ubwikunde, kubera ibyo ukabimwubahira, ukabimukundira, n’iyo wowe utabishobora
ku rugero nk’urwe, kubireba ukabibona kandi ukabikunda, ntubyite muri ya mvugo
innyega ubwenge buke bwo kwa padiri, bituma Yezu agushyira cyiciro
cy’abakwiriye igihembo cyagenewe abarangwa n’izo ngeso nziza mbonezamana na
mbonezabupfura. Ngo ukunda umuhanuzi kubera ko ari umuhanuzi, akwiriye igihembo
cyagenewe abahanuzi, ukunda intungane kubera ubutungane ayibonyemo, azahabwa
igihembo cy’intungane. Kureba umuvandimwe, maze wamubonamo ingeso nziza runaka
ukabimukundira, ni ikimenyetso kigaragaza ko nawe uri umukristu muzima, kandi
nawe Imana iguteganyirije igihembo nk’icy’abo bantu beza, n’ubwo waba wiyiziho
intege nkeya.
Bakristu bavandimwe,
aya magambo arahimbaje. Ni nde atatera imbaraga ngo agire ishyaka
ry’ibyiza ? Ngo agire ishya
rya Kiliziya ? Ngo akunde kandi afashe abigisha ? Ngo akunde
Abepiskopi n’abasaserdoti, n’abandi bayobozi ku nzego zitandukanye za
Kiliziya ? Sinyavuga ngo nisabire gukundwa kuko ndi umusaserdoti, ariko
umukristu wa Kiliziya Gatolika yagombye gukunda abihaye Imana urukundo rukomeye
kurusha ibyo abanegura, n’iyo byaba bifite ishingiro. Muri iki kinyejana
kunegura abo imvugo ya giseseka yita « abakozi b’Imana » bireze,
rimwe na rimwe bikabyara urwango ruteye ishozi n’ubwoba. Tujye twibuka ko mbere
na mbere ari abana b’Imana, n’iyo barangwa n’intege nkeya za kimuntu, kandi twibuke
ko nta kibuza Kristu kubakoreramo no kubakoresha, bityo bitume tubasabira
kurusha uko tubanenga.
Mwese
Tubifurije Icyumweru cyiza
Padiri Jean Colbert NZEYIMANA
Retour aux homelies
