ü Isomo rya mbere: Buh 6, 12-16
ü Zaburi 63 (62), 2, 3-4, 5-6, 7-8.
ü
Isomo
rya kabiri: 1Tes 4, 13-18
ü
Ivanjili:
Mt 25, 1-13.
Bavandimwe
kuri iki cyumweru cya 32 mu byumweru bisanzwe by’Umwaka A, amasomo yose uko ari
atatu araduhumuriza kuko aduhamiriza ko Imana yifuza kubana na twe by’iteka
ryose, gusangira na yo ibirori bihoraho mu Ijuru, kandi kugira ngo ibyo
bishoboke Yo ubwayo iduha ubuhanga butumurikira bukanadufasha gutekereza,
kugambirira no gukora igikwiye ku buryo buboneye, nta kudohoka cyangwa kurangara.
Isomo
rya mbere dukesha igitabo cy’Ubuhanga ryatugejejeho ibijyaye n’ubuhanga mu
magambo meza, ku buryo iyo umuntu
ayazirikanyeho, asanga ubuhanga buvugwa
atari Ubumenyi cyangwa inyigisho runaka umuntu yasanga ahantu aha n’aha, ahubwo
ubuhanga uko twabwumvise buragenura Ukuri
kw’Ijambo ry’Imana, ko guhora
kubengerana, kudashobora gusaza cyangwa gucuya, ko kwigaragariza abayikunda,
kukabera urumuri abayikunda kandi kukihishurira abashakashaka Imana n’umutima
utaryarya.
Mu
ntangiriro z’iki gitabo cy’Ubuhanga 1, 4-5, aho batubwira imikorere y’Ubuhanga
haragira hati: “Ubuhanga ntibwinjira mu
mutima ugira nabi, ntibutura mu mubiri ushikamiwe n’icyaha, kuko Umwuka
mutagatifu wo ujijura, uhunga uburiganya, ukagendera kure ibitekerezo
bihubutse, akarengane kaba gahingutse, ugapfukiranwa”.
Aya
magambo ararushaho kudusobanurira ayo twumvise muri iri somo agira ati
“Ubuhanga bwihishurira ababwifuza, bugafata iya mbere mu kubiyereka”. Ni ukuvuga ko uwifuza ubuhanga, uwifuza
kumurikirwa no kuyoborwa na bwo, uwifuza ko bumugira intaho yabwo yirinda
kugira umutima mubi, ntabe indiri y’ibyaha, akirinda uburiganya, akemera kwitoza
gukora ikiza, ntarangwe no guhubuka kandi ntashyigikire akarengane.
Bityo
rero iri sengesho twarigira iryacu: “[Mana] Butegeke
[ubuhanga] buve mu ijuru ritagatifu,
aho utetse ku ntebe y’ikuzo ryawe, ubwohereze, kugira ngo buntere inkunga menye
ikigushimisha, kuko bwo buzi kandi bugasobanukirwa na byose. Buzanyoborana
ubwitonzi mu myifatire yanjye, kandi ikuzo ryabwo rinshyigikire”.
Iyo
ni yo nyota twagombye guhorana nk’uko twabyumvanye umuririmbyi wa Zaburi , we
ugira ati: “Nyagasani ni wowe Mana
yanjye, mpora ngushakashaka uko bukeye! Umutima wanjye ugufitiye inyota,
n’umubiri wanjye ukakugirira urukumbuzi, meze nk’ubutaka bw’agasi bwabuze amazi
bukumirana”.
Bavandimwe
ibyo turarikiye, ibyo twifuza ni byo bigenga kandi bikagira uruhare rukomeye mu
kugena imikorere yacu. Umutima usonzeye Imana utuma nyirawo akora ibinogeye
Imana, naho umutima urarikiye ikibi ugatera nyirawo gukora ibibi.
Uyu
muririmbyi wa Zaburi we yameshe kamwe, nta kujijinganya bimurangwaho, kuko
yamaze kubona ikuzo ry’Imana n’ububasha bwayo mu buzima bwe, yamenye ko ineza
y’Imana nta ho ihuriye n’ubuzima bw’Umuntu, kuko iyo neza iburusha agaciro.
Bityo yiyemeza ko azahora aharanira kugororokera Imana, agahugukira isengesho,
agahora ayishimira, kuko azi neza ko ari yo imutabara, ko ari yo yamurinze.
Kuba
uyu muririmbyi wa Zaburi yemeza ko Ineza y’Imana yaguranwa amagara y’umuntu
(Zab 63, 4a), birarushaho kutwereka urukundo rw’Imana, kuko yemera
kutugaragariza iyo neza yayo ubudahwema mu buryo bwinshi, harimo no gusigasira
ubwo buzima yaduhaye ibuturindira muri iyi si kandi ikabudukomereza nyuma
y’urugendo rwacu hano ku isi. Ikibanzweho mu isomo rya kabiri dukesha 1 Tes 4,
13-18 ni izuka ry’abapfuye. Pawulo aradusaba kudaheranwa n’ubujiji nk’abatagira
icyo bizera cyangwa abatazi ukuri kw’impamo ku birebana n’amaherezo y’urugendo
rwa muntu hano ku isi: Urupfu nta bwo rushobora kugira ijambo rya nyuma ku
muntu. Uko Yezu yarutsinze akazuka mu bapfuye, ni na ko azazura abo yaremye,
kugira ngo urupfu arutsiratsize burundu, maze intore zimwizihiye zibane na we
ubuziraherezo. Bavandimwe igikuba gicika iyo twabuze umuntu buri wese muri twe
arakizi, ariko kandi uko Pawulo abitwibutsa, “niba kwizera Kristu kwacu guhagarariye kuri ubu bugingo gusa, twaba dukwiye
kubabarirwa bitambukije abandi bose” (1 Kor 15, 19). Pawulo wari warakataje
mu kwemera yageze ubwo agira ati: “Nifuza
kwigendera ngo mbane na Kristu, kuko ari
byo birushijeho kuba byiza” (Abanyafiilipi 1, 23). Hamwe na Pawulo rero
twashimira Imana ko abitabye Imana ubugingo batabucuzwa, ahubwo bahinduka
ukundi kandi n’imibiri twahanganywe ikaba izazuka ku munsi twita uw’imperuka.
Igikuru
muri ibyo byose ni ikuzo bene muntu bakesha Yezu Kristu wapfuye akazuka, We watugize
abana b’Imana n’abasangiramurage hamwe na We. Ni yo ncamarenga twumvise mu
Ivanjili: Gusanganira Umukwe no
kwishimana na We mu birori. Umugani w’abakobwa icumi barimo 5 b’abanyamutima na
5 b’abapfayongo uratuburira kandi ukaturangira icyo tugomba gukora: guhorana
amatara yaka.
Aba bakobwa bose bari batumiwe kandi bitabira ubutumire bari bahawe. Bategereje
umukwe igihe kitari gito, bishyize kera, igicuku kinishye barabakangura bati
« Nimubyuke mwakire umukwe mwari mutegereje » ! Batanu muri bo
basanze ntacyo bicaranye, amavuta yo kongera mu matara yakendereye, nta yandi
bafite yo kongeramo, abandi batanu bo basanga bagifite ayo kongeramo. Inkuru
yarangiye abafite amavuta yo kongera mu matara yabo binjiranye n’umukwe,
abatayafite bagiye gushaka aho bagura ayandi, ku bw’amahirwe make bagarutse
basanga urugi rwamaze gufungwa, bahera hanze.
Mu Ivanjili ya nditswe na Luka 12, 41, ubwo Yezu yari amaze gusaba abari
bamuteze amatwi guhora biteguye no guhorana amatara yaka yifashishije umugani
w’Abagaragu bari bategereje shebuja, Petero yaramubwiye ati « Mwigisha ni
twe uciriye uwo mugani cyangwa se uwuciriye bose » ?
No muri uyu mugani w’abakobwa icumi, hari uwakwibaza icyo kibazo Petero
yabazaga Yezu. Igisubizo cyaba ko uyu mugani ari twe Yezu awuciriye, bityo
bikadufasha kwibaza no gusuzuma icyo twicariye n’icyo twicaranye. Tukibaza niba
nk’abakristu duhora twiteguye kandi dufite amatara yaka. Aha ndavuga ibikorwa
by’urumuri, ibikorwa by’Ubuhanga
n’ubushishozi dukesha Roho Mutagatifu, muri byo tukaba twavuga kwita ku
bandi, kwigisha, gutera abandi inkunga, kurangwa n’ubuntu n’ubumuntu, gutabara
abatishoboye, gushyira imbere icyahesha buri wese icyubahiro, kwirinda
ubunebwe, kwiyumanganya mu magorwa, gusenga ubudahwema, n’ibindi nk’ibyo !
Bavandimwe uko kuba bari batumiwe no kuba barafatanyije n’abandi gutegereza
igihe kirekire bitahesheje aba bakobwa amahirwe yo gukingurirwa umuryango ubwo
bari bagarutse, ni nako kuba twaratowe muri Batisimu, tugataramana n’abandi mu
bindi bikorwa by’ubuyoboke, mu guhabwa cyangwa guhesha amasakaramentu no mu
bikorwa by’urukundo, ibyo ntibihagije niba tugejeje hagati tukadohoka cyangwa tugaterera agati mu
ryinyo, tukumva ko twageze iyo tujya. Urugamba rwo kwitagatifuza ntirugira
ikiruhuko, ni ukururwana kugera ku ndunduro, ni ko twongera amavuta mu matara
yacu. Twemere bitugore, kuko imvune
n’umuhate bisaba ntabwo byagereranywa n’ikuzo rizatugaragarizwamo, aho Kiliziya
nk’umugeni wa Kristu izicarana n’Umukwe mu ikuzo ry’ijuru, Ntama w’Imana
wishwe, ariko ubu akaba ari muzima by’Iteka ryose. Amen !
Padiri Gaspard BIJYIYOBYENDA
Retour aux homelies
