AMASOMO MATAGATIFU TUZIRIKANA:
DUHINDUKIRIRE YEZU WAZUTSE ATUMARE UBWOBA
Yezu
nyuma yo kuzuka nta kizitirwa n’ibintu cyangwa abantu. Ubu ni musumba bintu na bihe;
uko yari ameze mbere yo kwigira umuntu kwe. Yezu agira atya aba ahagaze hagati
yabo. Ubwoba nk’abantu burabafata, burabataha; ariko nk’uwatsinze ubwoba
n’urupfu arabamara ubwoba ati: ʺNi muhumure….. Ni munkoreho”.
Abereka ibiganza n’ibirenge, abereka umubiri we.
Yezu
niwe nyir’ihumure nyaryo, uwo yahumurije ntiyongera gufatwa n’ubwoba.
Abanyarwanda bati: ʺUhagarikiwe n’ingwe aravoma”. Yezu arenze iyo ngwe kuko uri
hamwe nawe uretse no kuvoma ntabwo yongera kugira inyota iyo ariyo yose uretse
iyo kumuguma iruhande.
Abigishwa
bamaze gusobanukirwa ko Yezu ataheranwe n’urupfu ko yarwigaranzuye maze ubwoba
bwimukira ibyishimo maze baba abo gutangara gusa. Nibyo koko ni ukuri nta
wahuye na Yezu ngo abe agikorera ku bwoba.
Ubwoba
ni ikimenyetso cy’intege nke, kuko uba wumva utihagije, ko ukeneye ukuba hafi
ngo akunganire, akurwanirire. Yezu wazutse rero aho ageze atsinda ubwoba,
akimika amahoro n’ibyishimo mu bamwemera kandi bakamwakira.
Uyu
munsi twemere duhura na Yezu wazutse maze atumare ubwoba. Dore ko muri iki gihe
dufite byinshi bihangayikishije muntu maze bikadutera ubwoba. Benshi baba bibaza
uko ejo bizamera, mbese uko bazabaho, ababyeyi bahangayikishijwe n’abana babo,
dore ko n’amashuri agiye gutangira bafite ubwoba bwa minerval; abasore batewe
ubwoba n’uko bazabona abagore b’abizerwa abakobwa nabo ni uko. Ariko se ibyo
byose wibuka kubibwira Musumba bihe Yezu Kristu watsinze ubwoba n’urupfu?
Hari
abapfakazi benshi n’imfubyi bose bibaza ku buzima bukabatera ubwoba, hari
abarwayi banyuranye, hari ibibazo byinshi bishobora gutera muntu ubwoba:
imitingito, Ibiza binyuranye, impanuka ni byinshi bishobora kugutera ubwoba. Ariko
uyumunsi araduhumuriza ati ni muhumure ubwoba n’urupfu narabitsinze. Nti
tukabeho nk’abadafite icyo bizeye.
Ntabwo
dushobora gukira cyangwa gushira ubwoba tutemeye guhura na Yezu. Ese twebwe abo
mu isezerano rishya twahurira he na Yezu? Dore hamwe muho dushobora guhurira: mu
isengesho rikuru ari ryo igitambo cy’Ukaristiya, aho Yezu atwiha mu Ijambo rye,
akatwiha wese mu gisa n’umugati no mu gisa na Divayi maze akatubera icyarimwe
igitambo, ifunguro n’inshuti tubana. Duhurira kandi na Yezu mu masakaramentu
anyuranye aho ayo masakaramentu aduha rwose ubuzima bw’Imana, maze
akadutagatifuriza muri kiliziya ya Yezu Kristu.
Yezu
amaze guhumuriza abe arabahugura, akabajijure. Ntabwo ashaka ko bahera mu
bujiji ku bijyanye n’ibyanditswe bitagatifu. Ubutumwa bwose Yezu yakoze ni
iyuzuzwa ry’ibyanditswe bitagatifu. Mu rupfu n’izuka bya Yezu Kristu, hujujwe
ibyo amategeko, Abahanuzi na Zaburi byavuze, bityo amahanga yose azigishirizwe
mu izina rya Yezu wazutse. Maze abazemera bazamukeshe ukwisubiraho n’ibabarirwa
ry’ibyaha. Ni ubutumwa Yezu yahaye ba 11 hamwe n’abazabasimbura bose.
Abo
ba 11 nibo twese dukesha kumenya Yezu Kristu wapfuye akazuka, hanyuma natwe
abemeye bagahinduka, duhamagariwe gutera ikirenge mu cyabo, tuba abahamya nibyo
Petero yatwibukije mu isomo rya mbere.
Bavandimwe, uyu munsi twese twaje guhura na Yezu. Kugirango rero twunge ubumwe nawe aradusaba ibintu bibiri by’ingenzi: Kwisubiraho no kugarukira Imana. Ngaho rero buri wese nafate umwanya yibaze icyo agomba guhindukaho. Buri wese yibaze aho agomba kwisubiraho. Kuko intabwe ya mbere yo kugarukira Imana ni ukumenya ko wagiye kure, maze ukababazwa no kuba kure y’Imana. Ese ujya wumva ubabajwe no kuba waragiye kure y’umuremyi? Nta kibabaza nko kuba kure y’Imana ntunabimenye. Ni igitutsi gikomeye kuba umuburagasani cg umuramana, biragatsindwa.
Umuhanzi
Rugamba Cyprien ati: ʺGuhinduka si uguhindukira gusa ahubwo ni
ugukebana”, niba twiyemeje guhinduka ni tubikomeze nta guhindagurika. Nta
byishimo byaruta iby’umunyabyaha wababariwe, ariwe umutagatifu. Tuzirikane
abatagatifu atari ababayeho badakosa cyangwa badacumura ahubwo, ni abamenye ko
bacumuye maze nti baheranwe bahaginduka burundu, bakiyemeza kudasubira kubyo
banze. Ariko usanga twembwe abo muri iki gihe cyacu tuvangavanga aka wa Mugabo
wari warakutse amenyo yajya kubatizwa bamubaza bati wanze shitani n’ibyo
idushukisha byose, kubera ibihanga ati “Ndavanze”. Hari abakristu benshi
bameze batyo bavangavanga. Ku cyumweru akajya mu missa, ku wambere akajya
kuraguza.
Ariko
nyamara ukuri ni kumwe nta cyo waburira kwa Yezu ngo ukibonere ahandi uretse
umuvumo n’urupfu. Abashaka umuvumo n’urupfu rero nababwira iki! Ariko nti
bikabe ahubwo twese duhinduke tube abantu bashya bahuye na Yezu wazutse maze
akabamara ubwoba, bakiyemeza kumukurikira no kumukurikiza abandi.
Yohani
mu isomo rya Kabiri aratubwira ibiranga uwahuye na Yezu maze akiyemeza
guhinduka by’ukuri: Icya mbere, bene uwo muntu aba inshuti ya Yezu idatenguha
akamukunda bagakundana maze bakaba umwe, kuko baba baziranye. Ibyo bikigaragariza mu kutabangamirwa na
rimwe n’amategeko y’Imana, kuko no mu buzima busanzwe ikintu cyose ukoranye
urukundo kidashobora kukunanira kuko uba wabanje kugikunda mbere ya byose. Ese
aho Yezu turamuzi koko? Niba tumuzi se koko dukurikiza amategeko ye?
Ikizagaragaza ko twunze ubumwe na Kristu ni uko dukundana kandi koko nibyo kuko
itegeko yezu yaduhare ribumbye yose ni iryo Gukundana. Maze ibyo dukora byose
bikabera ahabona, ari ibyo tuvuze cyangwa dukoze bikabera abandi ikimenyetso
cy’uko twahuye naYezu wazutse. Dore ko isi ya none ngo ikeneye abahamya kuruta
uko ikeneye abigisha kuko ubuhamya cg ingero zigisha kuruta kuvuga gusa.
Dusabirane
rero twese hamwe, guhurira na Yezu wazutse mu imanyura ry’umugati, maze twese
twisubireho kandi duhinduke; kuko yezu yiteguye kutubabarira ibicumuro byacu.
bityo tugumane ibyishimo by’uwazutse ari we Yezu Kristu Umwami wacu wemeye
kwigira umuntu.
Padiri Thémistoclès UFITIMANA
