Amasomo
matagatifu tuzirikana:
Isomo
rya mbere: Iyim 16,2-4.12-15;
Zab
78 (77);
Isomo
rya kabiri: Ef 4, 17.20-24;
Ivanhiri:
Yh 6, 24-35.
IGIKORWA
IMANA ISHIMA NI UKO MWAKWEMERA KO MUBESHEJEJWEHO NA YO
Ukwemera
ni ishingiro ry’ibyo twizera, kukatubera n’icyemezo cy’ibitagaragara ariko
twahishuriwe muri Kristu. Kristu yaduhishuriye ibanga ry’ubuzima, kandi ubuzima
buhoraho. Ubuzima kugira ngo bubeho ni ngombwa ko bugira icyibutunga. Ku
ruhande rumwe, ubuzima bw’umubiri hano ku isi, butungwa n’ibiribwa n’ibinyobwa
biva mu mirimo y’amaboko y’abantu. Ku rundi ruhande ubuzima bwa roho, butungwa
n’ijambo ry’Imana n’amasakramentu cyane cyane iry’umugati umanuka mu ijuru Yezu
Kristu atanga(Ukaristiya) kandi uwo mugati ni We ubwe. Ubwo buzima bwombi rero
buruzuzanya kandi bukaba bwuzuye. Naho rero ibitunga umubiri ntibizadutware
uruhu n'uruhande ngo twibagirwe ibitunga roho, kuko guhitamo kimwe ukirengagiza
ikindi ni ukwemera gukura nk’igihindungembe. Rimwe na rimwe bikakuviramo
kwirenganya no kurenganya abandi. Kwiyima iby’ubuzima bukeneye cyane cyane
ubuzima bwa roho ni ukwishyira ku ngoyi. Ariko cyane cyane kwihambira ku by’isi
bishira no kubigira ikigirwamana ni ukunyagirwa aho abandi bagabirwa.
Bavandimwe,
ni ryari abantu bashobora kwigobotora ingoyi y’akarengane? Iyo batimirije
imbere inda yabo gusa, ahubwo bakibuka n’ifunguro rya roho. Iyo batekereza
bagashyira ku munzani icyo bari cyo n’icyo batunze cyose bakihatira guharanira
ibituma Imana yubahwa, na muntu agahabwa agaciro aho yaba ari hose. Ikiruta
byose burya byose biryoha bisangiwe. Gabanya ubusambo bw’iby’isi, dore ko
hariho nabagira ubusambo bw’ibya roho bikanabaviramo kwikuza(orgueil
spirituel). Rimwe na rimwe ugahutaza abandi ushaka ibitunga umubiri cyangwa
ibitunga roho. Iyo Ivanjili y’Umwana w’Imana Yezu Krisitu ikurikizwa,
uburenganzira bw’ikiremwa muntu burubahirizwa. Nta we uhutazwa. Bose bajya
mbere mu buzima bw’umubiri n’ubwa roho bishimye. Reka twese dusange Yezu
Krisitu atumenyeshe icyaduteza imbere.
Igikorwa
Imana ishima ni uko mwakwemera
Abayahudi
babajije Yezu icyo bakora kugira ngo buzuze ibyo Imana ishima. Yezu ati: “Igikorwa
Imana ishima ni uko mwakwemera uwo yatumye”. Kwemera Krisitu Imana yatumye
ku isi, ni ukwakira inyigisho ye ishyira imbere urukundo. Nta rukundo, nta
bikorwa bifatika byateza abantu imbere. Nta rukundo cyane cyane rwa rundi
rwitangira ubabaye wese, nta n’amagambo yandi afite akamaro agaragara. Ahatari
urukundo rwa Krisitu, aho bataruharanira, nta we ukwiye kurangaza abantu ngo
arigisha. Inyigisho zitabohora abantu ku by’isi, za zindi zisinziriza muntu
agakomeza gutsikamirwa nko mu Misiri kera, izo nta kamaro. Inkuru Nziza igamije
ko muntu aba ikiremwa gishya kirangwa n’Urukundo rwa Kirisitu rwitangira
abamerewe nabi, rukababohora ku ngoyi y’akarengane n’ibyaha byangiza
urukundo.
Bavandimwe,
aho Inkuru Nziza yamamazwa bizira imbereka, imurikira abantu bakagaburirwa kuri
roho no ku mubiri. Ibyo kubatoteza no kubababaza ku buryo bwinshi birarangira
hakimikwa Urukundo rukuza Imana rugateza muntu imbere mu byiza bya hano ku isi
no mu bimuganisha mu ijuru. Ubukire bwanga ibyo ndaburetse, ntumpeho.
Twemerere
Nyagasani ahugure ubwenge bwacu
Bavandimwe,
muntu akomeje kwigira Bamenya na Nyirandabizi. Nyamara kuri iki cyumweru,
Nyagasani Imana Ishoborabyose se wa Yezu Krisitu utuyobora muri Roho
Mutagatifu, arashaka guhugura ubwenge bwacu. Umuntu wamenye Imana y’ukuri ari
mu rugendo rugana ubwigenge bw’abana b’Imana. Nta bucakara ubwo ari bwo bwose
bw’ibintu cyangwa bw’abantu. Nibikunanira kwigenga, ibohe wenyine ariko ureke
abandi babohoke, gusa uzaba uteye agahinda. Ubukristu bukwiye gutuma umuntu yishyira
akizana mu kuri no mu rukundo. Utaramenya ukuri kw’Imana, yiturira mu bucakara.
Uwakiriye Umwana wayo Yezu Krisitu, ntasubira mu bucakara ukundi. Muvandimwe,
waremwe n’Imana igukunda. Ishaka ko usangira ubuzima na Yo. Ntiwirangareho.
Haranira ubwo buzima. Irinde icyagucakaza cyose. Wikururwa n’ibiribwa byo mu si
gusa. Wirya cyangwa ngo unywe nk’uwaryohewe ubudasigaza. Wikwibwira ko umugabo
ari urya utwe akagerekaho n’utw’abandi. Mugabo wikwifatira ifaranga ngo urimire
n’iry’umugore ryaza ukarimira. Wikwiyiba, wikwiyibisha, wikwisahura. Kuri iki
cyumweru, duce akenge dufashijwe n’aya masomo Matagatifu cyane cyane iri jambo
rya Yezu: nimujye mukora mudaharanira ibiribwa bishira, ahubwo nimuharanire
ibiribwa bihoraho mu bugingo bw’iteka, ibyo umwana w’umuntu azatanga.
Nitwemere
ko Imana ari yo idutunze.
Muvandimwe,
ntukabone wariye, wanyoye, ufite inzu nziza, imyambaro, imodoka, ….. maze ngo
ugire uti: ndi Kazitunga. Tekereza ubuzima Abayisiraheli babayeho mu Misiri.
Ibuka uko abasekuruza babo bahasuhukiye. Misiri yari ikize cyane. Nta nzara nta
nyota. Ariko se muri iyo myaka magana ane babayeyo, bari bamerewe bate? Bariho
mu buretwa. Ubuhake bubapyinagaza ni bwo biberagamo. Nta bwigenge. Nta
gukopfora. Bagombaga kugenda bubitse umutwe, nta kuvuguruza abambari ba Farawo.
N’ubwo bari barapfukiranwe, icyo bibuka bose ni uko mu Misiri baryaga bagahaga.
Bibuka ibikono bitogota byuzuye ibinyama baryaga! Aka wa Mugore ubwira umugabo
ati unkubite urushyi ariko unyambike igitenge. Nyamara imiborogo yari yose mu
Bana ba Isiraheli. Koko rero kugira byinshi ariko udafite umutima wigenga,
umutima w’ubuntu n’ubumuntu ni ukunyagwa zigahera. Gusa rero, Imana
ntiyabatereranye. Igihe cyarageze iboherereza Musa.
Musa
yabyirutse ari umugabo wanga akarengane aho kava kakagera. Ni we wayoboye
umuryango wa Isiraheli wigobotora iyo ngoma y’agahotoro. Birumvikana ko
urugendo rugana mu gihugu cy’Isezerano rutari rworoshye. Ubuzima bushya bwo mu
butayu bwarabagoye. Habayeho igihe cyo kwijujuta. Nyamara imibabaro yose bahuye
na yo mu butayu, yabaye nk’ibibagiza ingoyi yo mu Misiri. Ni bwo batangiye
kwijujutira Musa n’Imana yabo. Bijujutaga bavuga ngo: “Iyo byibura twicwa
n’ukuboko k’Uhoraho tukiri mu gihugu cya Misiri, igihe twari twiyicariye
iruhande rw’inkono z’inyama, twirira n’imigati uko dushaka!”. Ibi
bitekerezo by’Abayisiraheli bazambijwe n’inzara n’inyota bisa n’aho
bidutangaje. Nyamara ni uko bimeze. Burya iyo umuntu ashonje, nta n’ubwo
atekereza neza. Iyo umuntu yicishijwe inzara, ibyo gutekereza ku matwara yandi
agirira abantu akamaro, ntibiba bikiriho. Cyakora na none, iyo umuntu ahawe
ibyo akeneye byose akadamarara, na none akenshi ntiyumva imibabaro y’abandi. Bavandimwe,
inda ntizadusubize inyuma. Inda ntizasumbe indagu nkuko babivugaga mu
kinyarwanda cyo hambere.
Kuva
kera no mu Bwami bw’Abagereki n’Abaromani, abami n’ibikomangoma babagaho nta
bibazo nyamara abakene baborogaga ntibabumve. Uwatamitswe amaronko kurusha
abandi, uwo nta bwenge agira bwo kugokera abakene. Ni uko ubusumbane
n’akarengane bikururira isi ibyago bitagira ingano. Abanyamisiri mu butayu,
bifuje ibiribwa batapfunaga nyamara bibagirwa ingoyi n’ikiboko byabahoragaho.
Igihe turimo, muntu yari akwiye guca akenge agashyira imbere ubutabera,
urukundo n’amahoro kuri buri wese. Ahari akarengane, nta rukundo ruharangwa.
Ahari ugupyinagaza abantu, nta matwara yandi ashyira muntu imbere aharangwa.
Abantu babaho mu gahiri n’agahinda. Reka tureke kwibajisha bino bibazo bya
gifarizayi na Kiyahudi kandi by’amaco y’inda: Mwigisha wageze hano ryari? Twagenza
dute kugira ngo dukore icyo Imana ishima? Ikimenyetso utanze ni ikihe? Ukoze iki
ngo tukwemere? Mwigisha jya uhora uduha kuri uwo Mugati. Nyamara se mwagizengo turasabwa ibintu
byinshi? Oya. Ni bibiri gusa: Gusanga Yezu no kumwemera. Agira ati: “unsanga
wese ntazasonza bibaho, n’unyemera wese ntazagira inyota bibaho”(Yh 6,35).
Kuri
iki cyumweru, dusabire Abashumba baragiye imbaga y’Imana, babashe kwita ku
buzima bwa roho n’ubw’umubiri bw’intama bashinzwe kandi natwe dukomeze kuba
abashumba bamwe ku bandi.
Umubyeyi
Bikira Mariya aduhakirwe!
Padri
Theoneste NZAYISENGA
