ü Isomo rya mbere: Yer 31, 7-9;
ü Zaburi 125 (126);
ü Isomo rya kabiri: Heb 5, 1-6;
ü Ivanjili: Mk 10, 46-52.
1. Yeriko, umujyi utangaje!
Yeriko, aho
Yezu yakirije iyi mpumyi, yari umujyi ukomeye uri ku brometero 16 mu
majyaruguru y’iburengerazuba y’inyanja y’umutuku. Yari iherereye mu kibaya cya
Yorudani. Ni umujyi bitaga uw’imikindo (Ivugururamategeko 34, 3), kuko wari
ahantu heza, hatari mu butayu, hari hateye ibiti byiza byiganjemo imikindo
nyine. Wari umujyi munini uri mu isangano ry’imihanda minini kandi ikomeye
ituruka i Yeruzalemu yerekeza ahantu hatandukanye. Uwo mujyi wagiraga ikirere
cyiza ku buryo abaherwe b’I Yeruzalemu bazaga kuharuhukira mu gihe cy’impeshyi.
Ni wo mujyi wa nyuma rero Yezu yanyuzemo, anawukoreramo igitangaza cya nyuma
mbere yo kujya i Yeruzalemu aho yagombaga kubabarizwa akanahapfira. Iki
gitangaza cyo guhumura Baritimeyo rero ni cyo Yezu yakoze bwa nyuma, agikorera
muri uwo mujyi; umuntu akaba yatekereza ko niba ari igitangaza cya nyuma Yezu
yakoze, ko yacyitondeye, mbese kikaba nk’agashinguracumu mu bitangaza byinshi
yari yarakoze mbere yaho, kandi ni ko bimeze nk’uko tuza kubibona.
2. Baritimeyo mwene Timewo, impumyi
yicaye ku nzira isabiriza!
Umwanditsi
Mariko aritonda akatubwira amazina ye n’umwirondoro we wose ndetse n’ikibazo
afite; kandi ubundi si akamenyero ke. Ntabwo rwose Mariko akunda kuvuga amazina
y’abantu Yezu yakizaga (kereka gusa wa mukobwa ya Yayiro muri Mk 5, 22). Niba
rero Mariko atinda ku mwirondoro wa Baritimeyo, hari inyigisho ashaka kuduha
awifashishije. Atubwira rero ko Baritimeyo ari mwene Timewo, kandi ko yari impumyi.
Mu gihe abandi bose bagenda
bagana i Yeruzalemu, Bairimewo we ntava aho ari. Aricaye kandi birumvikana kuko
atabonaga ntiyashoboraga kugena nkabo kandi atareba. Kuba yarasabirizaga byanze
bikunze nibwo buryo yari afite bwonyine bwo kubaho. Muri Israheli, umuntu
w’impumyi yendaga gufatwa nk’umunyabibembe. Abanyabibembe bari abantu bahezwaga
cyane, bakaba kure y’abandi ngo batabanduza, bakumva hari n’umuntu ubegereye
bakavuza inzogera kugira ngo amwitaze. Impumyi na zo Abayahudi barazihezaga
cyane, bagendeye ku byo igitabo cy’Abalevi cyavugaga, ko badashobora gutura
igitambo mu Ngoro (Lev 21, 18). Ubuhumyi babufataga nk’ubuhumane, kandi abenshi
muri bo bemeraga bakomeje ko bwabaga bwaratewe n’ibyaha byabo cyangwa
iby’ababyeyi babo, nk’uko bigeze kubibaza Yezu mu Ivanjili ya Yohani. Uko
guhezwa kugaragazwa n’aho Baritimeyo yari yicaye: hanze y’umujyi kandi iruhande
rw’inzira. Ibi byose Mariko abitubwira ashaka kutwumvisha akaga gakomeye ka
Timewo. Afite ibibazo bibiri bikomeye: kutabona no guhezwa na bose. Yari ari ho
ariko atariho.
3. Mwene Timewo atabaza mwene Dawudi.
Abantu bakunda
kuvuga ko umuntu ufite urugingo rwaremaye, imbaraga zarwo zijya mu rundi
rugingo ruzima cyangwa mu zindi ngingo nzima, maze zikagira imbaraga
n’ubushobozi bidasanzwe. Kuri Timewo na we, wagira ngo ubushobozi bwo kubona
atari afite kubera ubuhumyi bwagiye mu ijwi maze rigira ubushobozi budasanzwe.
Kandi koko, Timewo acyumva Yezu ahise yatangiye gutera hejuru atabaza Yezu,
imbaga y’abantu yari aho iramucecekesha ariko ntiyaceceka. Gusa rero, n’ubwo
bwose Timewo yari impumyi, yari azi neza uwo Yezu ari we kurusha ndetse
n’ababona neza. Kandi koko bo bamubwiye ko ari Yezu w’i Nazareti uhese, we
amutabaza amwita umwana wa Dawudi. Ikintu gitangaje ni uko muri Iyi vanjili ya
Mariko, ari we muntu wa mbere wise Yezu iryo zina, kandi nyuma ye nta wundi
uzarimwita. Iyi mpumyi rero si impumyi! Ihumye amaso y’umubiri ariko ay’umutima
arabona neza ndetse no kurusha ay’abantu bose bari kugendana na Yezu. Baritimeyo
azi Yezu uwo ari we akamenya n’icyamuzanye: Yezu ni umwana wa Dawudi wazanywe
no gukirisha bene muntu imbabazi z’Imana.
4. Inzitizi
Abenshi mu bari
aho babereye Baritimwewo inzitizi, kuko yatangiye gutabaza Yezu
bakamucecekesha. Nyamara icyari inzitizi ni na cyo cyamuteye inkunga, ku ka wa
mugani ngo “Uruzi rwoshywa n’amabuye”, na we kumucecekesha byakabuye icyifuzo
cye cyo gukira maze bituma arushaho gusakuza (kandi koko ubabaye ni we ubanda
urugi !), akomeza gutabaza mwene Dawudi. Umuntu umenyereye iyi vanjili ya
Mariko, yatekereza ko na Yezu ubwo ari bucecekeshe Baritimeyo kuko ntashaka ko
abantu bavuga uwo ari we. Roho mbi nzi zo zamuvumbuye bwa mbere zishatse kuvuga
uwo ari we arazicecekesha (Mk 1, 25.34); Petero na we avuze uwo ari we, Yezu
yaramwihanangirije we na bagenzi be ngo ntibavuge uwo ari we. Aha ngaha Yezu
asa n’uwemeye noneho ko Baritimeyo avuga uwo ariwe; n’ubwo atabitangaje ku
mugaragaro, ariko ntiyanabimubujije nk’uko yari asanzwe abikora.
5. Abafatanyabikorwa
Yezu amaze kumva
urusaku rwa Baritimeyo yarahagaze maze ategeka ko bamuhamagara, nuko ba bandi
bamucecekeshaga baramubwira bati “humura dore araguhamagaye”! abamuberaga
inzitize bamubera abafanyabikorwa; abamucaga intege baramuhumuriza. Icyo ni cyo
gitangaza cya mbere cyabereye hariya: guhumuka amaso kwa bariya bantu, uwo
babonaga yarahumanye bakamubonamo umuntu, uwo bari baraheje bakamuhamagara ngo
aze mu bandi.
6. Gusimbuka no kujugunya igishura
Acyumwa ibyo
Baritimeyo yakoze ibintu bibiri: gusimbuka no kujugunya igishura yari yambaye.
Gusimbuka bigaragaza umurego yari afite ukomoka ku cyifuzo cyo gukira no ku
cyizere yari afitiye Yezu. Kera nta byangombwa bindi byabagaho, umwambaro ni wo
wagaragazaga iimimerere y’umuntu; bityo rero kujugunya igishura byakumvikana
nko kwiyambura ubuzima yari asanzwemo kubera ijwi rya Yezu yumvise
rimuhamagara, agahobora ubuzima bushya yari amutegerejeho. Ni uguhindura
imimerere. Ni uguhinduka nyabyo, uko Yezu abyigisha muri IyiVanjili ya Mariko.
7. Icyo Baritimeyo ashaka
Dutangazwa n’uko
Yezu adahita akiza impumyi, ahubwo akabanza kuyibaza icyo yifuza ko ayikorera.
Ugukira k’umuntu ni umurimo uhuza ubushake bwe n’ububasha bw’Imana. Baritimeyo
amaze kuvuga ko ashaka kubona, Yezu amutangariza ko ukwemera kwe ari ko kumukijije.
Ariko nyuma yaho hagaragara ikindi kintu Baritimeyo yashakaga n’ubwo atakivuze
ku buryo bweruye.
8. Kuva mu buhumyi no mu guhezwa ukaba
umwigishwa wa Kristu
Baritimeyo
amaze kubona yakurikiye Yezu. Baritimeyo rero yashakaga no kuba umwigishwa wa Yezu. Aha rero ni ho
twasubira inyuma noneho tukumva neza impamvu mu ntangiriro y’iyi Vanjili Mariko
yatinze ku mwirondoro wa Baritimeyo. Kwari ukugira ngo atugaragarize ukuntu
Baritimeyo yari ari kure cyane: mu mwijima w’ubuhumyi no mu bwigunge bwo
guhezwa na sosiyete. Ubu noneho icyo yashakaga kugeraho turacyumvise : umuntu
ashobora kuva ahantu nk’aho akaba umwigishwa wa Kristu abikesha ukwemera. Kandi koko, imyitwarire y’iyi mpumyi ntisanzwe
: icyifuzo ndakumirwa cyo gukira, umurego wo kwigerera kuri Yezu akarenga
inzitizi zagaragaraga nk’izirenze ubushobozi bwe mu buryo bwose; gusimbukana
imbaraga asanga Yezu atitaye ko umwenda we utakaye; ibi tubisanga hake mu
Ivanjili. Inyuma y’ibi bikorwa byose Yezu yahabonye ukwemera kwamuviriyemo
gukizwa. Iyi Vanjili rero ni urugendo rusa na rwa rundi Imana yakoresheje Umuryango
wa Israheli twumvise mu isomo rya mbere. Kandi muri uwo muryango naho harimo
impumyi. Nka Baritimeyo, na bo batakiye Uhoraho bagira bati “Tubabarire”, ni
uko Uhoraho abakoresha urugendo rubahindurira ubuzima.
9. Ukwemera
Ivanjili
itwereka kenshi Yezu yemeza ko ukwemera « gushobora byose ». Kimwe na
Baritimeyo, ni kenshi Yezu abwira abo
amaze gukiza ati « ukwemera kwawe kuragukijije » ! Hari abaza bamutakambira
akababwira ati « upfa kwemera gusa… » ! Yigeze anihanangiriza abigishwa be ati
« N’iyo mwagira ukwemera kungana n’impeke y’ururo, mwabwira umusozi muti va
hariya ujye kwitera mu nyanja bikaba ».
Ubuzima butagira ukwemera buba bumeze nka ya
nzu yubatse ku musenyi Yezu avuga mu Ivanjili. Mu nzu zacu za kinyarwanda haba
igiti gishamikiyeho ibindi bifashe igisenge bakunda kwita MWIKOREZI cyangwa
MWAMBA. Ukwemera nako twakugereranya n’icyo giti : niyo MWIKOREZI y’ubuzima
bw’umuntu. Icyo giti kiramutse kivunitse, igisenge cyose cy’inzu cyagwa. Ni
kuri ubwo buryo rero n’umuntu iyo ataye ukwemera ubuzima bwe busenyagurika !
Ukwemera ni bwo bukungu ushobora gutunga
ukabwizera. Inzu yawe ishobora gusenyuka; umwambaro bashobora kuyikwiba, ariko
ukwemera ntawakugeraho ngo agushyikire maze akukwambure. Guhishe kure muri wowe
nta wagutwara.
Ukwemera ni bwo bukungu buhanitse. Ugufite
kumutuza mu kindi gihugu : igihugu cy’Imana ; akumva kandi akabona ibyo abandi
batumva cyangwa ngo babone. Umuntu wuzuye ukwemera, igihe abandi babihiwe, we
aba aryohewe ; igihe abandi bacitse intege we akuzura ubutwari. Ni inshyimbo
umuntu asindagiriraho iyo byakomeye ; ni ubuvumo umuntu azimiriramo iyo
yagirijwe. Ni intwaro itsinda intambara zose.
Padiri
Théodose MWITEGERE
Retour aux homelies
