Amasomo matagatifu tuzirikana:
ü Isomo rya mbere: Imigani
31,10-13.19-20.30-31;
ü Z 128(127);
ü Isomo rya kabiri: 1 Tes
5,1-6;
ü Ivanjiri: Mt 25,14-30
Italenta isumba zose twahawe: ubushobozi bwo gukunda
Turi ku cyumweru
cya 33 gisanzwe, icyumweru kibanziriza icya nyuma cy’umwaka wa Liturjiya.
Igitaha ni umunsi mukuru wa Kristu Umwami. Nk’uko papa Fransisko yabyifuje
kandi akabitangaza, ku cyumweru cya 33 Kiliziya izajya ihimbaza umunsi mukuru
mpuzamahanga w’umukene. Papa yifuza ko Kiliziya ya Kristu ihora irabagirana mu mahanga
yose nka Kiliziya ikennye kuko ikeneye Imana kandi ikeneye kugera ku muntu wese
kandi Kiliziya ibereyo bose cyane cyane abakene, ingorwa n’abatereranywe. Iyi
ni inshuro ya 7 Kiliziya ihimbaje ku mugaragaro umunsi w’umukene.
Insanganyamatsiko y’uyu mwaka iragira iti: “Ntihazagire umukene n’umwe
wirengagiza” (Tobi 4,7). Ntawe ukize kuri byose, nta n’ushobora kwiha
ubwe servises zose. Buri wese afite
ibyo akeneye; akenera abandi kandi n’abandi hari ibyo bamukeneraho. Nyamara
ariko tuzi ko hari abakene cyane kandi rwose badafite iby’ibanze nkenerwa
byabafasha kubaho bishimye. Abo bakene ni abacu, ni abavandimwe bacu.
Tubakunde, tubegere, twicarane nabo, tubumve, dusangire nabo, tubasabire,
tubafashe maze muri twe babone Kristu ubakunda.
Dukunde umurimo maze mu byo twungutse turambure
ikiganza dusangire n’abakene bacu
Mu isomo ryo mu
gitabo cy’Imigani twumvise ibyiza biranga umugore w’umutima. Twibuke ko muri
Bibiliya umugore ashushanya umuryango w’Imana, Kiliziya. Naho umukwe cyangwa
umugabo w’uwo mugore akaba ari Kristu (reba Ef 5,21-33). Umugore w’umutima
ntarangwa gusa no gukunda umurimo cyangwa gutinya Uhoraho. Ibi ni byiza cyane
ariko nyibihagije. Kuri byo yongeraho kuramburira amaboko ye abakene,
akabaremera, akabafasha. Ijambo ry’Imana riti: “akagirira ubuntu ababuraniwe”. Umugore w’umutima ahora ari maso,
arangamira Uhoraho kandi azi neza ko bidahagije kwifurahisha! Zaburi igaya
cyane umugore w’umupfapfa, uwe urya wenyine, akihaza mu mibereho, akihanagura
ku munwa akirengiza abandi. Umugore wikungahaza ubwe, akima amatwi akanwa
kavuza induru gataka inzara ku irembo rye, uwo nta mugore umurimo!
Kiliziya ni wa
mugeni cyangwa umugore mwiza, w’umutima: yumva abana bayo bataka kubera inzara,
ubukene n’izindi ngorane. Irabasabira, irabumva, irabegera kandi igerageza mu
bushobozi bwayo kubaramira no kubaremera. Urukundo rw’Imana nirwogere maze
rugere ku bakene; CARITAS yubahahwe maze abakene bacu batere impundu
z’ibyishimo bati: Aleluya, natwe twabonye Imana. Tuzirikane ko ku munsi
w’urubanza, abakene n’indushyi tuzaba twaragobotse ari bo bazatwakirana
ibyishimo mu ihirwe ry’Ijuru.
Twese twahawe italenta y’ikirenga izatwinjiza mu
ihirwe rihoraho
N’ubwo
tutanganya, nyamara twese Imana yaduhaye amatalenta. Bamwe bahawe atanu, abandi
abiri, abandi imwe. Igishimishije ni uko twese twahwe. Nta waburiyemo! Twahawe
amatelanta anyuranye kugira ngo twuzuzanye kandi dufashanye muri urugendo.
Ivanjili itwereka ko bamwe bahawe atanu, abandi abiri, abandi imwe.
Dufite byinshi biduhuza:
twese uduha impano, umugisha, ubuzima, ubwinyagambure, kuramba no kuramuka ni
umwe: Imana Data, Umubyeyi udukunda. Ikindi kiduhuza: twese duhamagariwe
kubyaza umusaruro ibyiza dukesha Imana, bigahesha izina rye ibisingizo n’ikuzo,
bikatugirira akamaro kandi bikakagirira Kiliziya n’abantu Imana yiremeye.
Duhuriye kandi ku kuba twese twarahawe italenta y’ikirenga ariyo kuba twararemanywe twese ubushobozi bwo gukunda.
Imana izaducira
urubanza idahereye ku bwinshi bw’ibyo twakoze ahubwo ihereye ku buryo twashyize
mu ngiro, mu bikorwa ubwo bushobozi karemano rwo gukunda. Ntuzabazwa uko
wakunzwe, uzabazwa uko wakunze Imana n’abantu. Imana ni urukundo. Udakunda, uwo
si uw’Imana. Mwene uyu ni nka wa wundi wahawe italenta imwe arayitabika,
ntiyagirira abandi akamaro. Imana iha buri wese ibyiza ikurikije ikigero cye
cyo kwakira.
Hari igihe
twifuza nabi tugasaba ibiturenze ku buryo Imana ibiduhaye byarenga ingano
y’ibiganza byacu bikameneka. Dusenge:
Nyagasani, dusaba nabi tukarambirwa, turakwemereye duhitiremo uduhe ibiri ku
rwego rwacu no ku myumvire yacu wowe umenya ibidukwiriye kandi byose ukabiduha
ku buntu. Ibyo uduhaye ku buntu, uduhe kubikoresha neza dusangira kandi
twuzuzanya n’abandi bitume ingoma yawe y’urukundo, impuhwe n’ukuri yogera hose.
Icyumweru cyiza!
Padiri Théophile NIYONSENGA
Retour aux homelies
