Amasomo matagatifu
tuzirikana:
ü Isomo rya mbere: 1 Bami 17, 10-16
ü Zab 146 (145)
ü Isomo rya kabiri: Heb 9, 24-28
ü Ivanjiri: Mk 12, 38-44
Umuntu
nyamuntu arangwa n'ibintu 2 by'ingenzi aribyo: Ubumuntu n'Ubuntu. Amasomo matagatifu yo kuri iki cyumweru aradufasha
kubizirikanaho. Mu isomo rya mbere baratubwira umugore w'umupfakazi wagiye
kuzanira amazi Umuhanuzi Eliya ku buntu. Uwo mugore kandi yahaye
Umuhanuzi Eliya umutsima ku buntu. Uwo mugore kandi yacumbikiye
umuhanuzi Eliya ku buntu.
Muri
iyi minsi umuco w'ubuntu ugenda ukendera hirya no hino ku isi. Umuco w'ubuntu
wasimbuwe na Urampa angahe? Urampa angahe kugira ngo njye kukuzanira
amazi yo kunywa? Urampa angahe kugira ngo njye kuguhekera umurwayi?
Urampa angahe kugira ngo njye kukurwariza umurwayi? Urampa angahe kugira
nkurangire inzira? Urampa angahe kugira ngo nkucumbikire? Umubyeyi atuma
umwana we amazi, umwana akamubwira ngo urampa angahe? Umugabo arasaba umugore bashakanye kumuha
service, umugore agasubizaa ngo arampa angahe? Bavandimwe iyo nta buntu
bugihari, burya n'ubumuntu buba bwagiye. Twongere twige umuco wo kugira
ubuntu n'ubumuntu.
Ivanjili
yo kuri iki cyumweru igizwe ni ibice 2 by'ingezi ariko byuzuzanya . Igice cya
mbere, Yezu aratubwira Umuntu wabuze ubuntu n'ubumuntu. Yezu akatubwira
ko tugomba kwirinda abantu nkabo.
Umwanditsi w'Ivanjili yavuze ko uwo muntu yari Umwigishamategeko.
Umwigishamategeko yabaga yaraminuje mu byanditswe bitagatifu, ashinzwe
kubisobanurira abandi. (Twamugereranya n'umuntu ufite impamyabumenyi y'ikirenga
muri Bibiliya.) Ikibabaje ni uko
kubisobanurira abandi yarabikoraga, ariko kubikurikiza byaramunaniye. Yabuze
ubuntu n'ubumuntu. Kuko ngo icyabo ari ugusenya ingo
z'abapfakazi!!!!!!!!!!! birababaje. Muri ino minsi wumva abanyamasengesho
babaswe n'ubusambanyi ndetse n'izindi ngeso mbi nyinyinshi. Muri ino minsi isi
yacu ifite abigisha benshi, bahabwa cyangwa biha amazina meza cyane: ba
Apôtres, ba Prophètes, Abanyamavuta, ba Bishop, n'andi mazina aremereye.
Amazina si cyo kibazo. Ikibabaje ni uko
hari bamwe muri bo badakurikiza ibyo bigisha. Ibikorwa byabo bigahindukira
bigasenya inyigisho zabo. Ugasanga nibo basenya ingo z'abashakanye, abayoboke
babo bakabahindura indaya zabo, bagacyura abapfakazi bitwaje ubufasha
babagenera, nibo bahindutse
abatekamutwe, nibo bahindutse abambuzi, nibo bahindutse abasinzi, n'ibindi bibi
byinshi ..... bataye ubumuntu n'ubuntu. Niba wumva ubarizwa muri icyo
cyiciro, hinduka. Kuko uyu munsi niwowe Yezu arimo atunga itoroshi.
Ntudahinduka, umva icyo Yezu yavuze: « Abo bazacirwa urubanza rukaze kurusha
abandi. » ( Mk 12,40).
Igice
cya kabiri cy'Ivanjili, Yezu aratwereka urugero rw'undi muntu ugira ubuntu.
Nawe ni umupfakazi w'umukene. Umwanditsi w'Ivanjili aragira ati «Yezu yari
yicaye mu Ngoro y'Imana, ahateganye n'ububiko bashyiragamo amaturo, yitegereza
uko rubanda batura». yego ni byo koko Yezu yitegereza uko dutura. Yezu areba
byose. N'igihe dutura aba atubona. N'igihe twanze gutanga ituro ryo gufasha
Kiliziya twitwaje ko ntacyo dufite aba atubona. Nuko ngo Yezu arareba,
abona abakungu benshi bashyiragamo byinshi. Ngo maze haza
umupfakazi w'umukene, ashyiramo uduceri tubiri. Umupfakazi w'umukene ariko
wuzuye ubuntu! Gukena kubi ni ukubura ubuntu. Kandi gukena
ntibibuza umuntu kugira ubuntu. Hari abakene bagira ubuntu, ariko kandi
hari n'abakungu batagira ubuntu n'ubumuntu. Dushobora kuzirikana
Ivanjili ivuga iby'umuntu w'umukungu n'umukene wasabirizaga witwaga Lazaro (Luka 16,19-31). Muri icyo gikorwa cyo gutura hari ikintu cyakoze ku mutima wa Yezu, maze
ahitamo kugisangiza abigishwa ati “Ndababwira ukuri: Uriya mupfakazi w'umukene
yarushije abandi bose gutura. Kuko bariya bose bashyizemo ku by'ikirenga, naho
we yashyizemo ibyari bimutunze byose.”
Bavandimwe,
uriya mupfakazi w'umukene yashoboraga
gutura igiceri kimwe agasigarana ikindi, akabona icyo aza kwifashisha asubiye
mu rugo, ariko yahisemo gutanga ibyo atunze byose. Uriya mupfakazi w'umukene yashoboraga
gutekereza ko akennye, ntatange ituro. Uriya mupfakazi w'umukene yashoboraga
kuza aje gusabiriza, Uriya mupfakazi w'Umukene yashobora kutaza no gusenga
yitwaje ko atabonye umwambaro mwiza n'ibindi.
Uyu mupfakazi w'umukene afite icyo yigisha abantu baciye bugufi,
abakene, abatabasha kubona ifunguro rya buri munsi, cyangwa abaribona
byabagoye, afite icyo yigisha abashomeri, afite icyo yigisha abahembwa
umushahari muto. Gukena ntibikakubuze kugira ubuntu n'ubumuntu. Gukena
ntibikakubuze kuzuza inshingano zawe muri Kiliziya.
Uyu
mupfakazi atwigisha kurenga inzitizi zose
zishobora kutubuza guhura n'Imana. Uyu mupfakazi w'Umekene wo mu
Ivanjili ya none hamwe n'umupfakazi w'Umukene wo mu isomo rya mbere ni ingero
nziza z'uko abantu baciye bagufi, bafite ubushobozi bucyeya, bashobora
kwitagatifuza bigakunda muri bicyeya Imana yabahaye. Ibyo dutunze byose byaba
bicye cyangwa byinshi dushobora kubikoresha neza bikatuzanira umugisha.
Turangamire Yezu we wagize ubuntu busumbye ubw'abantu bose akitanga ku buntu
nk'uko Isomo rya kabiri ryabitumbwiye.
Roho Mutagatifu
adushoboze, aduhe imbaraga zo kuvoma mu masomo y'uyu munsi inyigisho zubaka
ubukristu bwacu. Umubyeyi Bikiramariya adusabire.
Padri Emmanuel TWAGIRAYEZU
Diyosezi ya Nyundo
