Amasomo matagatifu tuzirikana:
Isomo rya mbere: Intg 22,1-2.9-13.15-18;
Zab 116 (115)
Isomo rya kabiri: Rom 8, 31b-34
Ivanjiri: Mk 9, 2-9
Bavandimwe, mu
rugendo rw'iminsi 40 tugomba gukora mu gisibo, kugira ngo tugere kuri Pasika, ubu
tumaze kugenda iminsi 10. Ni ukuvuga ko dusigaje kugenda iminsi 30. Iminsi 10
ishize si micye, kuko umubare 10 ungana n'amategeko 10 Imana yaduhereye ku muosozi wa Sinayi ngo
atuyobore kuri Yo. Bivuga ko umuntu wagiye azirikana nibura Itegeko rimwe ry'Imana
buri munsi muri iki gihe cy'Igisibo, uyu munsi yagombye kuba amaze kuyahetura
yose. Ese wowe muri iyo minsi 10 ishize,
urugendo rw'Igisibo urugezehe? Wararutangiye? Ururimo? uri umufana ? cyangwa igisibo ucyumvira mu
binyamakuru? Wabona utegereje guhimbaza Pasika utarahimbahije igisibo? Ariko birakwiye ko uzirikana iri jambo, “ nta
gisibo, nta Pasika”, “nta mubabaro, nta byishimo”, “nta rupfu,nta zuka”. niba waracyerewe kwinjira mu gisibo, uhawe
andi mahirwe, kuko imbere yawe hakiri iminsi mirongo itatu.
Isomo rya mbere
n'Ivanjili byagarutse ku ijambo ryitwa «umusozi». Mu isomo rya mbere twavanye
mu gitabo cy'intangiro, umutwe wa 22, twumvise Imana isaba Abrahamu, kujya ku
musozi wa Moriya, gutamba umwana we w'ikinege akunda Izaki . Imana idusaba kuyiha ibyo dukunda cyangwa
kuyitura ibyo dukunda cyangwa kuyegurira ibyo dukunda. Kandi ibyo uhaye Imana,
ntacyo utakaza, ahubwo urunguka. Ikigenzi ni umutima wumvira ugushaka
kw'Imana. Abrahamo yarumviye ajya gutamba
umwana we w'ikinege, agazeyo Imana imwereka intama aba ariyo atamba, kuko Imana
yari yaragije kubona umutima we. Umwana yari yamuhawe n'Imana imusaba
kuyimutura. Hari igihe tujya twima Imana ibyayo, tukayima ibyo yaduhaye ngo
turagire. Ibyo twakiriye nk'indagizo tukabyita ibyacu. Nyirabyo ariwe Mana
yabikenera tukabimwima. Birababaje!
Mu Ivanjili
yanditswe na Mariko twumvise Yezu azamukana n'abigishwa be 3 ( Petero, Yakobo,
na Yohani) mu mpinga y'umusozi, agezeyo yihindura ukundi mu maso yabo, ndetse
bahabwa n'ubutumwa mu ijwi rigira riti «Uyu ni umwana wanjye nkunda cyane, nimumwumve!». Kuri iki cyumweru, Ijambo ry'Imana riraduhamagarira
kumvira Yezu. Ese Yezu avugira hehe? Yezu avugira mu mutima wacu. Mu Ivanjili
yose ni Yezu uvuga. Tumwumve,
Tumwumvire.
Ese kuki Yezu yihindurira ukundi mu mpinga
y'umusozi? Kuki abigishwa bagomba kuzamuka umusozi kugira ngo bakunde kubona
ikuzo ry'Imana? Kuki ibi byose Yezu atabikoreye ahantu h'ikibaya, dore ko no
kuzamuka umusozi birushya cyane?
Umusozi muri Bibiliya
ushushanya ahantu umuntu ahurira n'Imana. reka tuzirikane ingero zimwe na
zimwe:
Mu gitabo cy'Iyimukamisiri ( Umutwe wa 19 n'Umutwe 20),
Igitabo cy'Ibarura (Umutwe 3), Igitabo cya Nehemiya ( Umutwe wa 9), batubwira
umusozi wa Sinayi ariwo Imana yahereyeho Musa amategeko icumi ( 10).
Mu gitabo cy'Ivugururamategeko ( Ivug 11, 29), Igitabo cya
Yozuwe (Yoz 8,33); Igitabo cy'abacamanza (abac 9,7), tuhasanga umusozi wa
Garizimu. Uyu ni umusozi abayisiraheli bahererwagaho umugisha.
1)
Mu Ivanjili yanditswe na Luka ( Lk 22,39-41) batubwira umusozi
w'imizeti Yezu yasengeragaho. Haranditse
ngo “Arasohoka, ajya ku musozi w’Imizeti
nk’uko yari asanzwe abigenza, n’abigishwa baramukurikira. Amaze kuhagera,
arababwira ati «Nimwambaze, kugira ngo mutagwa mu bishuko. Nuko arabitarura
ajya ahareshya n’aho umuntu yatera ibuye; arapfukama, arasenga”. Yezu
yasengeraga ku musozi.
2)
Mu gitabo cy'Ivugururamategeko (Ivug 32,49 ; 34;1), ku Musozi wa Nebo, niho
Imana yerekeye Musa igihugu cy'Isezerano.
3)
Mu gitabo cy'Intangiriro, umutwe wa 22 ( Intg 22,2) no mu
gitabo cya kabiri cy'amateka (2 Matek 3,1), batubwira umusozi wa Moriya. Kuri
uyu umusozi niho Imana yohereje Abrahamo gutamba umwana we w'Ikinege Izaki.
Twanabyumvise mu isomo rya mbere.
4)
Ku musozi wa Moriya kandi , niho Salomoni yubakiye
Uhoraho Ingoro ( 2 Matek 3,1).
5)
Mu gitabo cya mbere cy'Abami ( 1 Bami 18,9), tahabona
umusozi wa Karumeli, aho Umuhanuzi Eliya yatsindiye abahanuzi b'ibinyoma ba Behali bageraga kuri 450.
6)
Muri Matayo, umutwe wa 5 ( Mt 5,1), batubwira ko Yezu
yatereye umusozi, akicara, ari kumwe n'Abigishwa be, maze akigisha ikivunge
cy'abantu.
Izi ngero zose
dufashe ziratwereka uburyo Imana ihurira n'abantu ahantu hazwi. Muri Bibiliya,
umusozi ugenura aho umuntu ahurira n'Imana bakaganira, ikamugezaho ugushaka
kwayo ( nk'uko Musa yakiriye amategeko yayo ku musozi wa Sinayi), Ndetse
n'abantu bakayitura ibyiza batunze (
nk'uko Abrahamu yumviye ugushaka kw'Imana) yamusabaga gutura gutamba umwana we
w'ikinege).
Ese mu gihe cyacu
umusozi twahuriraho n'Imana ni uwuhe? Nko mu gihugu cyacu cy'u Rwanda ni uwuhe
musozi twahurira n'Imana? Tuzajye kuri
Muhungwe se cyangwa kuri Kalisimbi? Cyangwa se undi musozi muremure utwegereye? Hoya rwose. Kugira ngo duhure n'Imana si
ngombwa gushaka imisozi miremire. Iriya misozi yose yagenuraga Kiliziya .
Kiliziya yacu ihagarariye umusozi wa Moriya (kuko tuhaturira Igitambo).
Kiliziya ihagarariye umusozi wa Sinayi ( Kuko muri Kiliziya, tubwirwa inzira
itugeza ku Mana). Kiliziya yacu ihagarariye umusozi wa Karumeli ( kuko muri
Kiliziya Yezu adutsindira Shitani n'abambari bayo). Kiliziya yacu ihagarariye
umusozi w'Imizeti ( kuko tuhasengera Imana ikatwumva). Kiliziya yacu ihagarariye umusozi Yezu yigishirijeho
ikivunge cy'abantu ( kuko muri Kiliziya Yezu akomeza kutwigisha). Kiliziya yacu
ihagaririye umusozi wa Taboro ( kuko muri Kiliziya Yezu yihindura ukundi muri
Ukaristiya ntagatifu maze akatwiha mu bimenyetso by'umugati na Divayi). Muri
iki gihe cy'Igisibo rero nimuze tuzamuke tujye muri Kiliziya, niho tuzumva ijwi
ritubwira riti: «Uyu ni umwana wanjye
nkunda cyane, nimumwumve!». kandi muri Kiliziya tuzahumvira ijwi ritubwira riti
“ Icyo ababwira cyose mugikore” ( Yh 2,5) kuko kizabageza ku mukiro w'iteka
ryose. Amen
Padiri Emmanuel TWAGIRAYEZU
Retour aux homelies
